Thursday, October 16, 2014

ဘာ့ကြောင့်ငြိမ်ငြိမ်ထိုင်ရတယ် (လောကဓမ္မ ဒဿနစာစုများ)

ဤစာအုပ်တွင်-
- ဘာသာဝင်ဦးရေတိုးအောင် သာသနာပြုသင့်သလား။
- သားရှင်ပြုအလှူ လှူကြသူများအကြောင်း။
- ညီချင်လျှင် ညွတ်ပေးရသည့် သီအိုရီ။
- တရားအားထုတ်မှုနှင့် ပတ်သက်သည့် အယူအဆများ။
- ကလေးများ၏ အနာဂတ်။
- လူတစ်ယောက်သေဆုံးလျှင် ရေအိုးခွဲသည့် အယူအဆ မှန်/မမှန်။
- သမီးရည်းစားရင်ကြားစေ့ရေးနှင့် အမျိုးသားရင်ကြားစေ့ရေး စသည့် လောက ဓမ္မရေးရာ စိတ်ဝင်စားဖွယ်ရာ အကြောင်းအရာများကို ရေးသားစုစည်းထားပါသည်။

Friday, August 22, 2014

သာသနာတည်ကြောင်းတရား (၇) ပါး

ကိုထူး။ ။ ဗုဒ္ဓသာသနာတော်ဟာ တစ်ချို့လူတွေ ပြောနေကြသလို အနောက်နိုင်ငံတွေဘက်မှာ ထွန်းလင်းလာစရာအကြောင်း ရှိပါသလားဘုရား။

အရှင်။ ။ သာသနာတော်ဟာ အာရှမှာတည်လိမ့်မယ်၊ အနောက် ဥရောပမှာတည်လိမ့်မယ်၊ အာဖရိကမှာတည်လိမ့်မယ်လို့တော့ တပ်အပ်ကျ ပြောလို့ မရပါဘူး။ အဲသလို ဟောတော်မူထားခဲ့တဲ့ ဒေသနာတော်လည်း မရှိပါဘူး။ သို့သော်လည်း အကြောင်းတရား ခုနစ်ပါးနဲ့ ပြည့်စုံတဲ့ နေရာတွေမှာ သာသနာတည်တော်မူလိမ့်မယ်ဆိုပြီး အင်္ဂုတ္တိုရ်၊ သတ္တကနိပါတ်၊ ဒေဝတာဝဂ်မှာလာရှိတဲ့ အပ္ပမာဒဂါရဝသုတ္တန်စတဲ့ ဒေသနာတော်တွေကို ကိုးကားပြီး ဆရာမြတ်တွေ ဖြေဆိုတော်မူထားကြတာတွေ ရှိတယ် ကိုထူးရဲ့။

ကိုထူး။ ။ အဲဒီ အကြောင်းတရား (၇) ပါးကို သိပါရစေဘုရား။

အရှင်။ ။ ကောင်းပြီ၊ သေချာမှတ်ပါ။
(၁) သက်တော်ထင်ရှား မြတ်စွာဘုရားအပေါ်မှာ၊ ဓာတ်တွေ မွေတော် စေတီတော်တွေအပေါ်မှာ ရိုသေလေးစားမှုရှိခြင်း။

(၂) မဂ်လေးပါး၊ ဖိုလ်လေးပါး၊ နိဗ္ဗာန်၊ ပရိယတ္တိဓမ္မ ဆိုတဲ့ တရားတော်တွေ အပေါ်မှာ ရိုသေလေးစားမှု ရှိခြင်း။

(၃) ဒီနေ့မှ သာမဏေဝတ်ခါစ ကိုရင်လေးကစပြီး သီလရှိတဲ့ရဟန်းသံဃာတွေ အပေါ်မှာ ရိုသေလေးစားမှုရှိခြင်း။

(၄) သီလ၊ သမာဓိ၊ ပညာလို့ဆိုအပ်တဲ့ သိက္ခာသုံးပါးအပေါ်မှာ ရိုသေလေးစားမှုရှိခြင်း။

(၅) တည်ကြည်ငြိမ်သက်မှု သမာဓိတရားအပေါ်မှာ ရိုသေလေးစားမှုရှိခြင်း။

(၆) မမေ့မလျော့မှု သတိတရား (တနည်း) သတိပဋ္ဌာန်တရားတော်အပေါ်မှာ ရိုသေလေးစားမှုရှိခြင်း။

(၇) ပစ္စည်းလေးပါး ထောက်ပံ့လှူဒါန်းခြင်းဖြင့် ချီးမြှောက်စေ့စပ်ခြင်း (အာမိသပဋိသန္ထာရ)၊ တရားဓမ္မဟောပြောပြသခြင်းဖြင့် ချီးမြှောက်စေ့စပ်ခြင်း (ဓမ္မပဋိသန္ထာရ) တို့အပေါ် ရိုသေလေးစားမှု ရှိခြင်း။ တို့ပါပဲ။

ကိုထူး။ ။ မှန်လှပါဘုရား။

အရှင်။ ။ ဆိုလိုတာက၊ အာရှ၊ အာဖရိက၊ ဥရောပ မရွေးပါဘူး၊ အဲဒီတရား ခုနစ်ပါးနဲ့ ပြည့်စုံတဲ့ သူတွေ နေတဲ့နေရာမှာ သာသနာတော် တည်ပါလိမ့်မတဲ့ ကိုထူးရဲ့။

ကိုထူး။ ။ မှန်လှပါဘုရား။

အရှင်။ ။ လက်ရှိသာသနာတော်တည်နေပါတယ် ဆိုတဲ့ နေရာတွေမှာတောင်... ဆင်းတုတော်တွေ စေတီပုထိုးတွေကို အုတ်ပုံသာသာ၊ လည်ပတ်စရာ နေရာတွေအဖြစ်သာ သဘောထားလာကြတဲ့တစ်နေ့၊ တရားဓမ္မတွေကို လှောင်ပြောင်ဖို့ ဝန်မလေးတော့တဲ့တစ်နေ့၊ သီလရှိတဲ့ ရဟန်းသာမဏေတွေကို အရိုအသေ မပေးနိုင်တော့တဲ့တစ်နေ့၊ သီလ သမာဓိ ပညာ အကျင့်သိက္ခာတွေကို ဘေးဖယ်လာကြတဲ့တစ်နေ့၊ တည်ကြည်ငြိမ်သက်မှု သမာဓိကို ပျက်ရယ်ပြုလာကြတဲ့တစ်နေ့၊ သတိပဋ္ဌာန်တရားတွေကို ရှုတ်ချလာကြတဲ့တစ်နေ့၊ ပစ္စည်းလေးပါးထောက်ပံ့မှုတွေ တရားဓမ္မဟောပြောမှုတွေ ရပ်တန့်သွားကြတဲ့တစ်နေ့... အဲဒီနေရာကနေ သာသနာတော် ကွယ်ပျောက်သွားမှာ အမှန်ပဲ ကိုထူးရဲ့။

ကိုထူး။ ။ အမှန်ပါပဲဘုရား။

အရှင်။ ။ တန်ဖိုးရှိတာကို တန်ဖိုးရှိမှန်းသိမှ တန်ဖိုးထားစောင့်ရှောက်ဖို့ စိတ်အားထက်သန်ကြတာ ဓမ္မတာပဲ ကိုထူးရဲ့။ ဘုရားအဆုံးအမ သာသနာတော်ရဲ့ တန်ဖိုးကို မြင်အောင် ကြည့်တတ်ကြဖို့ သိအောင်ကြည့်တတ်ကြဖို့ လိုပါတယ်။

ကိုထူး။ ။ မှန်ပါဘုရား။

အရှင်။ ။ သာသနာတော်ပြန့်ပွါးထွန်းကားတဲ့ နေရာနဲ့၊ သာသနာအဆုံးအမ မရှိတဲ့ နေရာ၊ သာသနာအဆုံးအမအတိုင်း လိုက်နာတဲ့ မိသားစုနဲ့ သာသနာအဆုံးအမ လုံးဝမရှိတဲ့ မိသားစု၊ ကိုယ့်သန္တာန်မှာ သာသနာ အဆုံးအမ တည်နေခိုက်နဲ့၊ သာသနာအဆုံးအမ လက်လွတ်ခိုက် ငြိမ်းချမ်းမှုချင်း မတူညီကြပုံတွေကို ယှဉ်ထိုးကြည့်ရင် မြင်နိုင်ကြမယ်ထင်တာပဲ ကိုထူးရဲ့။

ကိုထူး။ ။ မှန်ပါတယ်ဘုရား။ ဒီနေ့ခေတ်မှာဆို သတင်းစီးမျောမှုတွေကလည်း မြန်ဆန်လာတော့ ပိုပြီး သိနိုင် မြင်နိုင်ကြပါတယ်ဘုရား။

အရှင်။ ။ ဟုတ်တယ်။ သာသနာတော်ကြီး တည်တံ့ခြင်းသည် လောကသားတွေ ငြိမ်းချမ်းမှုတည်တံ့ခြင်းပဲ၊ သာသနာတော်ကွယ်ခြင်းသည် ငြိမ်းချမ်းမှုတရားကွယ်ပျောက်ခြင်းပဲ။ ဆိုတော့.. ကဲ .. အပေါ်က ခုနစ်ချက်ကို မှတ်မိလွယ်အောင် လင်္ကာလေး ရေးပေးလိုက်မယ်။ အဲဒီခုနစ်ချက်နဲ့ ကိုက်ညီတဲ့ သူတွေ များလာအောင် ကြိုးစားနိုင်ကြပါစေ ကိုထူးရေ။

ကိုထူး။ ။ ကြိုးစားအားထုတ်ပါ့မယ်ဘုရား။

{ရတနာသုံးရပ်၊ ကျင့်မြတ်သိက္ခာ၊ သမ္မာသမာဓိ၊ သတိပဋ္ဌာင်္နံ၊ ပဋိသန်ဟု၊ ခုနစ်တန်တရား၊ ရိုသေငြား၊ ဘုရားသာသနာတည်ကြောင်းတည်း။}

မေတ္တာဖြင့်
အရှင်ဝိသာရဒ (ရမ္မာဝတီ)
17/08/2014

Thursday, April 3, 2014

လေးစားပါတယ် ကိုယ့်လူတို့

- ရန်ကုန်ကားတို့သည် တရွေ့ရွေ့တွားသွားနေကြ၏။
- နေ့လည် ၁၂ နာရီခန့် နေအပူသည် ခြစ်ခြစ်တောက်ပူ၏။
- ကတ္တရာလမ်းသည် အခိုး တရှိန်ရှိန်ထ၏။

"သောက်ရေသန့်ရမယ်၊ ကွမ်းယာရမယ်..၊ သောက်ရေသန့်အေးအေးလေးရမယ်.."
"ဂျာနယ်ရမယ်..၊ ဂျာနယ်စုံ..၊ ဂျာနယ်စုံ.."

- ရေခဲငွေ့တို့ဖြင့် စိုရွှဲနေသော ရေသန့်ဗူးကလေးများ၊ သွပ်ကြိုးကွင်းဖြင့် ဖောက်တွဲ ထားသော ကွမ်းယာထုပ်ကလေးများ၊ လက်တွင်ပွေ့ထားသော ဂျာနယ်များကို ထိုးပြရင်း ကားတွေကြိုးကြား အော်ဟစ် သွားလာရောင်းချနေကြသော ဈေးသယ်များကား ကျားမအစုံ၊ အရွယ်စုံ။ အသက် (၁၀) နှစ် အရွယ်ခန့်မှသည် အသက် (၅၀) ခန့်အထိ ပါဝင်၏။

- ခပ်နွမ်းနွမ်းအဝတ်အစားကလေးများနှင့် နေလောင်ထားသည့် အသားအရေတို့မှာ ချွေးတို့ဖြင့် စိုရွှဲနေကြရှာသော်လည်း မသုတ်ပစ်အား၊ ကားဟွန်းသံများအကြား အပြေးအလွှား အော်ဟစ်ရောင်းချနေကြရှာလေသည်။ ကားပေါ်မှ လှမ်းဝယ်သူ ငွေရေတွက်နေခိုက် သက်ပြင်းကို တချက်ရှိုက်ရင်း လက်ဖမိုးဖြင့် သပ်ချလိုက်သည့် ချွေးစက်တို့ခမျာကား အခိုးရှိန်ရှိန်ထနေသည့် ကတ္တရာလမ်းမပူပူပေါ် အငွေ့ပျော်ကြရရှာလေသည်။

- သည်နေရာမှ ဖြတ်သွားတိုင်း ထိုသူများကို မြင်တွေ့ရ၏။ ထိုသူများကို မြင်ရတိုင်း လေးနက်သည့် ခံစားချက်တစ်မျိုးနှင့် ပြင်းပြသည့် ဆန္ဒတစ်မျိုးတို့ ဖြစ်ပေါ်မြဲ ဖြစ်လေသည်။

- ခံစားချက် တစ်မျိုးကား ဆင်းရဲသော်လည်း မလိမ်မညာ၊ မခိုးမဝှက်၊ ဘယ်သူ့ဆီမှာမှလည်း ခခယယ အသနားမခံ၊ ကိုယ်ကျင့်သိက္ခာကိုလည်းမချနင်း၊ ခန္ဓာကိုရင်း၍လည်း စီးပွါးမရှာ၊ ကိုယ့်ခွန်ကိုယ့်အားဖြင့် ရိုးရိုးသားသား သမ္မာအာဇီဝကျကျ ဝမ်းစာရှာနေကြသူများဖြစ်၍ နက်နက်နဲနဲလေးစားမိခြင်းပင်ဖြစ်ပြီး၊

- ဆန္ဒတစ်မျိုးကား ပင်ပန်းဆင်းရဲလှသည့် ထိုအနေအထားမှ မြန်မြန်ဆန်ဆန် လွတ်မြောက်ကြစေလိုခြင်းပင် ဖြစ်လေသည်။

မေတ္တာဖြင့်
အရှင်ဝိသာရဒ (ရမ္မာဝတီ)
31/03/2014

Saturday, November 23, 2013

ပရလောကသားများအတွက်ပရဟိတ (အမျှဝေနည်းနှင့်ကုသိုလ်ပြုနည်းလမ်းညွှန်)

"သဇင်သားစာစဉ် အမှတ် (၃)"
ပရလောကသားများအတွက်ပရဟိတ (အမျှဝေနည်းနှင့်ကုသိုလ်ပြုနည်းလမ်းညွှန်) Pdf ရပါပြီ။


 ဤစာအုပ်တွင် မြန်မာနှင့်သီရိလင်္ကာ အမျှဝေပုံ ခြားနားချက်များ၊ ပြိတ္တာများကိုသာ အမျှဝေ၍ ရနိုင်သည်ဟုဆိုသော် လူအချင်းချင်း အမျှဝေရကျိုး ရှိနိုင်-မရှိနိုင်၊ ဗုဒ္ဓဘာသာဝင် မဟုတ်ခဲ့သူ တစ်ဦး သေဆုံး၍ ပြိတ္တာဖြစ်နေခဲ့လျှင် သာဓုခေါ်နိုင်- မခေါ်နိုင်၊ ထက်မြက်သော တိဟိတ်ကုသိုလ်ဖြစ်ရန် မည်သို့ပြုလုပ်ရမည်နည်း၊ ကုသိုလ်ဘယ်လိုရသနည်း၊ ကုသိုလ်ကံတရားများ မိမိတို့သန္တာန်ဝယ် မည်သို့မည်ပုံ လိုက်ပါနေသနည်း... စသည့် စိတ်ဝင်စားဖွယ်ရာ အကြောင်းအရာများကို အခြေခံကျကျ ရေးသားထားပါသည်။

မေတ္တာဖြင့်
အရှင်ဝိသာရဒ (ရမ္မာဝတီ)



Sunday, June 30, 2013

ခဏခဏ အမှတ်ရမိတဲ့ အဖြစ်အပျက်လေးတစ်ခု

ခုတလော လွန်ခဲ့တဲ့ ငါးနှစ်လောက်က အဖြစ်အပျက်ကလေး တစ်ခုကို ခဏခဏ အမှတ်ရနေမိတယ်။ အထူးသဖြင့် နေထိုင်မကောင်းတဲ့ အခါမျိုးတွေမှာ အဲဒီအဖြစ်အပျက်ကလေးကို ပြန် အမှတ်ရမိတတ်ပါတယ်။

အဲဒီတုန်းက  တောရွာလေးတစ်ရွာမှာ ကျောင်းထိုင်ဘုန်းကြီးအဖြစ် တာဝန်ယူနေခဲ့ရတယ်။ ရွာကလေးဟာ မြစ်နဲ့ နီးတဲ့အလျောက် တခါတလေ မနီးမဝေးရွာတွေက မြစ်ထဲမှာ တစ်လ နှစ်လ စသည် မိသားစုလိုက် တဲထိုးနေထိုင်ပြီး တံငါလုပ်ငန်း လုပ်ကိုင်ကြသူတွေရဲ့ သာရေးနာရေးပွဲတွေကို  မြစ်ထဲအထိ လိုက်ပါဆောင်ရွက် ပေးရတတ်ပါတယ်။

ဆောင်းရာသီရဲ့ ညနေခင်းတစ်ခုမှာ မြစ်ထဲက တဲစုတစ်စုဆီကို အခြားသံဃာတော် (၈) ပါးနဲ့အတူ ကြွရောက်ခဲ့ရပါတယ်။ စက်တပ်လှေကလေးတွေနဲ့ လာရောက်ပင့်ဆောင်ကြတာပါ။ နေဝင်ဆည်းဆာမှာ တောင်ပြန်လေ ပြေလျလျနဲ့ ဒီရေအကျကြောင့် လှိုင်းလုံးကလေးတွေ တအိအိထနေတဲ့ မြင်ကွင်းဟာ ဘယ်လိုမှ မေ့ပျောက်လို့ မရတဲ့ မြင်ကွင်းတစ်ခုပါပဲ။ တစ်နာရီခွဲ သာသာလောက် ခုတ်မောင်းအပြီးမှာတော့ ရေလုပ်သားများ စံပျော်ရာ ပိုက်ဆိပ်တဲစုဆီသို့ ဆိုက်ရောက်ကြပါတော့တယ်။  

ဒီရေတောထဲက သစ်ပင်ရှည်ရှည်တွေကို တိုင်လုပ်ပြီး မြစ်ထဲမှာ တည်ဆောက်ထားတဲ့ ခြေတံရှည်တဲတွေပါ။ တဲတစ်ခုနဲ့တစ်ခုကို အလွယ်တကူ ကူးသန်းသွားလာလို့ရအောင် တံတားကလေးတွေထိုးပြီး လက်ရန်းတန်းကလေးတွေ တပ်ဆင်ထားကြတာကို တွေ့ရပါတယ်။ သံဃာတော် ကိုးပါးကို သုံးနေရာခွဲပြီး နေရာချထားပေးပါတယ်။ သံဃာတော်တွေနဲ့အတူ လိုက်ပါလာတဲ့ ဒကာကြီး အယောက် (၂၀) လောက်ကိုလည်း သင့်တော်သလို နေရာချထားပေးကြပါတယ်။ သူတို့တဲစုမှာ တဲအိမ်ပေါင်း (၂၀) ကျော်ရှိပါတယ်။

ရေနွေးကြမ်း၊ အအေး၊ ထန်းလျက်များ ဆက်ကပ်လှူဒါန်းပြီး၊ တစ်နာရီလောက် နားကြပြီးတဲ့ အခါမှာတော့ တဲတန်းရဲ့အလယ် ဧည့်ခန်းလို့ ခေါ်နိုင်တဲ့ နေရာမှာ စုဝေးကြပြီး သံဃာတော်များထံမှ ပရိတ်တရား ဒေသနာတော်များကို နာကြားကြပါတယ်။ အဲဒီနောက်မှာ ဆရာတော်တစ်ပါးက ညတရားဒေသနာ ဆက်လက်ဟောကြားချီးမြှင့်တော်မူပြီး အသီးသီး အနားယူကြရပါတယ်။ သူတို့တွေကတော့ နောက်နေ့သံဃဒါနဆွမ်းအတွက် ပြင်ဆင်ချက်ပြုတ်ကြရင်း၊ ကလေးတွေကတော့ ဗီဒီယိုကြည့်ရင်း တစ်ညတာကို ကုန်လွန်စေခဲ့ကြပါတယ်။

နောက်နေ့မနက် အရုဏ်ဆွမ်းဘုဉ်းပေးအပြီးမှာတော့ အညောင်းပြေအညာပြေ တံတားလေးပေါ်မှာ ခြေဆန့်လက်ဆန့် လုပ်ရင်း မြစ်ပြင်ကြီးရဲ့အလှမှာ နစ်မျောနေမိပါတယ်။ ပင်လယ်ပျော် ငှက်ကလေးတွေလည်း ဟိုမှသည်မှ ပျံဝဲရင်း ဘာသာဘာဝ မြူးထူးပျော်ပါးနေကြတာကို တွေ့ရပါတယ်။ နီးစပ်ရာ တဲစုတွေဆီက စက်တပ်လှေငယ်ကလေးများလည်း တဘုတ်ဘုတ် မြည်သံပေးရင်း ဟိုမှသည်မှ ရောက်လာနေကြပါတယ်။ အသံချဲ့စက်က ဖွင့်ထားတဲ့ ဓမ္မတေးသံတွေ ကြားထဲမှာ “ကပိုင်ချောင်းအုပ်စု ရောက်လာရာဝေး၊ လာကတ်ဝေး (ကပိုင်ချောင်းအုပ်စု ရောက်လာပြီဟေး၊ လာကြဟေး) ”  စတဲ့ အသိပေးသံ ကြိုဆိုသံတွေနဲ့ စည်ကားနေပါတယ်။

 မနက် (၈း၀၀) နာရီလောက်မှာ သီလပေး၊ တရားဟောဖြစ်ပါတယ်။ အဲဒီနေ့က ဓမ္မပဒပါဠိတော်လာ
“ယော စ ၀ဿသတံ ဇီဝေ၊ ဒုဿီလော အသမာဟိတော။
ဧကာဟံ ဇီဝိတံ သေယျော၊ သီလ၀န္တဿ ဈာယိနော။” ဆိုတဲ့ ဂါထာကို သူတို့ နားလည်လွယ်အောင် ဟောပြောဖြစ်ခဲ့ပါတယ်။

ဦးဇင်းတို့လူမျိုးတွေဟာ ဗုဒ္ဓဘာသာဝင်တွေပီပီ သူ့အသတ်ကိုမှီပြီးတော့မှ ကိုယ့်အသက်ကို မွေးရတဲ့ အလုပ်မျိုးတွေကို မလုပ်လိုသူတွေကများပါတယ်။ ငါ့ဝမ်းပူဆာ မနေသာလို့၊ အခြားလုပ်စရာမရှိလို့၊ မလွှဲသာလို့ လုပ်ရသည့်တိုင်အောင် အခိုက်အတန့်မျှသာ ဒီလုပ်ငန်းကို လုပ်မယ်ဆိုတဲ့ အသိက လူတိုင်းမှာ ရှိကြပါတယ်။  ဒီလုပ်ငန်းကနေ ရနိုင်သလောက်လည်း ရုန်းထွက်တတ်ကြပါတယ်။ အနည်းဆုံးတော့ သင်္ကြန် ဝါကျွတ် ဆိုသလို အခါကြီး ရက်ကြီးတွေမှာ သူ့အသက်ကိုမှီခိုရတဲ့ အလုပ်မျိုးတွေကနေ လွတ်အောင်ရှောင်ပြီး ဥပုသ်သီလ ဆောက်တည်ဖြစ်အောင် ကြိုးစားတတ်ကြပါတယ်။

ဒီကနေ့သည်လည်း ဒကာ-ဒကာမတို့ အသက်မွေးဝမ်းကြောင်း လုပ်ငန်းကို ရပ်နားပြီး သံဃာတော်များနှင့် နီးစပ်ရာ မိသင်္ဂဟများကို ဖိတ်မန္တကပြုလို့၊ ကိုယ်တိုင်လည်း သီလဆောက်တည်လို့၊ သူတပါးတို့ကိုလည်း သီလဆောက်တည်စေလို့၊ သီလရှိတဲ့သူတွေကို အလှူဒါနပြုလို့၊ တရားဓမ္မတွေ နာကြားလို့ နေကြတယ်ဆိုတာ ကုသိုလ်ကောင်းမှုပြုရမယ့်အရေးမှာ မမေ့မလျော့ နေကြရာလည်း ရောက်ပါတယ်။

“သီလ, သမာဓိမရှိဘဲ အနှစ်တစ်ရာပတ်လုံး အသက်ရှည်နေရခြင်းထက် သီလ, သမာဓိရှိပြီး သမထ-၀ိပဿနာကို ရှုနေသောသူရဲ့ တစ်ရက် တနက်မျှ အသက်ရှည်ရခြင်းက ပိုပြီး မြတ်တယ်” လို့ မြတ်စွာဘုရား ဟောတော်မူထားတဲ့အတွက် မိမိတို့ အသက်မွေးတယ်ဆိုတာဟာ အသက်ရှင်ရပ်တည်နေရုံမျှလောက်သာ မဟုတ်ဘဲ၊ သီလဆောက်တည်နိုင်ရေး၊ သမာဓိ ပညာ လုပ်ငန်းတွေကို လုပ်နိုင်ရေးအတွက်လည်းဖြစ်တယ် ဆိုတာကို မမေ့မလျော့ ဦးတည်ထားကြရမှာ ဖြစ်ပါတယ်။

တစ်နေ့တာ သီလနဲ့ ပြည့်စုံတာကိုတောင် ဘုရားရှင် ချီးမွှမ်းတော်မူရင် တစ်ပတ်တာ၊ တစ်လတာ၊ တစ်နှစ်တာ၊ တစ်သက်တာ သီလနဲ့ ပြည့်စုံတာကို ဘုရားရှင်ဘယ်လောက် ချီးမွှမ်းတော်မူလေမလဲ ဆိုတာကို လေးလေးနက်နက် တွေးကြရမှာ ဖြစ်ပါတယ်။ ဆိုတော့ကာ.. ဒီနေ့လို သီလရှိတဲ့နေ့တွေ၊ သမာဓိ- ပညာဖြစ်ပွါးကြောင်း စုပေါင်းပြီး တရားဓမ္မနာကြားကြည်ညိုကြတဲ့နေ့တွေ ကို အသက်ရှင်ခွင့်ရတဲ့ နေ့တွေထဲက ဒီထက်မက ဆွဲထုတ်ရယူနိုင်ကြပါစေ..။” စသဖြင့် ဟောပြောဖြစ်ခဲ့ပါတယ်။ သူတို့တွေလည်း အင်မတန် ကျေနပ်ကြပါတယ်။  တရားဟောပြီးတဲ့နောက် လှူဖွယ်ဝတ္ထုတွေ လှူဒါန်း၊ ကိုယ်စောင့်နတ် မြစ်စောင့်နတ်တွေကစလို့ အမျှပေးဝေပြီး နေ့ဆွမ်းဆက်ကပ်လှူဒါန်းကြပါတယ်။ မြစ်ထဲက ရေလုပ်သားတွေ မြစ်ထဲမှာ စုပေါင်းဆက်ကပ်ကြတဲ့ တစ်သက်မမေ့နိုင်စရာ သံဃဒါနကုသိုလ်ပွဲတစ်ခုပါပဲ။

ညနေ ကျောင်းကို ပြန်ရောက်တော့ စိတ်မကောင်းစရာ သတင်းတစ်ခုက ဆီးကြိုလို့နေပါတယ်။ စစ်တွေမှာ သီတင်းသုံးနေတဲ့ အဆုပ်ရောဂါ အခံရှိတဲ့ သူငယ်ချင်းရဟန်းတော်တစ်ပါး အသည်းအသန်ဖြစ်လာလို့ ဆေးရုံတင်လိုက်ရတယ် ဆိုတဲ့ သတင်းပါပဲ။

စာရေးသူ အနေဖြင့် သူဟာ လူ့ဘဝတုန်းက ဘိလပ်မြေသိုလှောင်ခန်းတစ်ခုမှာ အလုပ်လုပ်ခဲ့ရသူဖြစ်ပြီး သူ့ရဲ့အဆုပ်ဟာလည်း အတော်ပျက်စီးနေပြီ ဆိုတာကို သိထားပါတယ်။ သူဟာ အသက် (၂၀) လောက်မှာ သာသနာ့ဘောင်ကို ဝင်ရောက်လာခဲ့ပြီး ပရိယတ္တိစာပေများကို သင်ယူလေ့လာခဲ့တယ်။ စာဝါအားလပ်ချိန်တွေမှာ ရိပ်သာဝင်ပြီး တရားဓမ္မအလုပ် အားထုတ်လေ့ရှိတယ်။ တခါတလေမှာ စာရေးသူတို့ ငယ်ဆရာတော်ဆီမှာ သုံးလတန်သည်၊ လေးလတန်သည် လာရောက်နေထိုင်တတ်ပါတယ်။ အအေးအားကြီးတဲ့ အခါမျိုးဆိုရင် သူ့ခမျာ အသက်ရှုမဝတော့ပါဘူး။ ချောင်းတွေ တဟွတ်ဟွတ် ဆိုးတတ်ပြီး သူ့ကို ကြည့်ရတာ ပေါင် (၁၀၀) တောင် ပြည့်မယ် မထင်ရတော့ပါဘူး။ အံ့သြစရာကောင်းတာက ဘယ်တော့မှ ပျက်မသွားတဲ့ သူ့အပြုံးတွေပါပဲ။

တခါတလေမှာ ကုတင်ပေါ်မှာ ဝမ်းလျားမှောက်ပြီး ချောင်းတွေတဟွတ်ဟွတ်ဆိုး၊ ကုတင်အောက်က ထွေးခံမှာ တံတွေးတွေ တပျစ်ပျစ် ထွေးနေရတဲ့ကြားက တကုတ်ကုတ် စာရေးနေတဲ့သူ့ကို တွေ့ရတတ်ပါတယ်။ လစဉ်ထုတ် ဘာသာရေးမဂ္ဂဇင်းတွေမှာ သူ့ဆောင်းပါးတွေကို ရံဖန်ရံခါ တွေ့လာရတတ်ပါတယ်။ ဝေဒနာကို ခံစားရင်း၊ တရားအားထုတ်ရင်း၊ ဘာသာရေးအသိတွေကို မျှဝေပေးနေသူအဖြစ် လေးစားမိရတာကတော့ အမှန်ပါပဲ။ ခု  ထိုအရှင် စစ်တွေဆေးရုံက ကုတင်တစ်လုံးပေါ် ရောက်နေ ရှာသတဲ့။

မနက်က ဟောဖြစ်ခဲ့တဲ့ “သီလမရှိ သမာဓိမရှိဘဲ အနှစ်တစ်ရာပတ်လုံး အသက်ရှည်နေရခြင်းထက် သီလရှိ၍ သမထ၀ိပဿနာကို ရှုနေသောသူ၏ တစ်ရက်မျှ အသက်ရှည်ရခြင်းသည် မြတ်၏။” ဆိုတဲ့ ဓမ္မပဒဂါထာလေးက ခေါင်းထဲကို အဟုန်ပြင်းပြင်းနဲ့ ပြန်လည် ဝင်ရောက်လာခဲ့ပါတယ်။ ဟုတ်တယ်။ သူ့လို ပုဂ္ဂိုလ်မျိုးအတွက် တစ်ရက် တစ်မနက်လောက် အသက်ဆက်ရှင်ခွင့်ရခဲ့ရင် တစ်ရက်အတွက် သူတရားဆက်မှတ်ခွင့် ရပေလိမ့်မယ်။ အကျိုးရှိတဲ့ စာပေတစ သူချန်ထားရစ်ခဲ့ နိုင်လိမ့်မယ်။ သူ အသက်ရှင်နိုင်သမျှ ဆက်ရှင်နေခြင်းဟာ သူ့အတွက်ရော အများအတွက်ပါ အများကြီး တန်ဖိုးရှိတယ်။

လောလောဆယ် လက်ထဲမှာ မနက်က မြစ်ထဲက ဒကာတွေ လှူလိုက်ကြတဲ့ နဝကမ္မ နှစ်သောင်း ရှိနေတယ်။ အနည်းဆုံး ဆေးတစ်လုံးစာဖိုးလောက်တော့ ရတန်ကောင်းရဲ့။ သတင်းပေးလာသူက သူ့အကို၊ နက်ဖြန် စစ်တွေကို လိုက်သွားမည်ဆိုတော့ အားပေးစကားနဲ့အတူ ထိုနဝကမ္မ နှစ်သောင်းကို ဆေးဖိုးအဖြစ် လှူဒါန်းဖြစ်လိုက်ပါတယ်။ တကယ်တော့ အဲဒီတုန်းက ငွေနှစ်သောင်းဆိုတာ ဘာမှ ဆန်းတာမဟုတ်၊ ကိုယ့်မှာလည်း အဲသလောက်သာ ချမ်းသာသည်။ ဒီထက်မက လှူချင်သည်။ မည်သို့ဆိုစေ အကျိုးရှိသည့် အသက်ရှင်ခြင်းအကြောင်းကို ထိုနေ့က ကောင်းကောင်းကြီး နားလည်ခွင့်ရခဲ့လိုက်ပါသည်။

လွန်ခဲ့တဲ့ ငါးနှစ်လောက်က အဲဒီအဖြစ်အပျက်ကလေးကို ခုတလော ခဏခဏ အမှတ်ရနေမိတယ်။ အထူးသဖြင့် နေထိုင်မကောင်းတဲ့ အခါမျိုးတွေမှာ အဲဒီအဖြစ်အပျက်ကလေးကို ပိုပြီး အမှတ်ရနေမိတတ်ပါတယ်။

မေတ္တာဖြင့်
အရှင်ဝိသာရဒ (ရမ္မာဝတီ)
30/06/2013

Saturday, June 29, 2013

ကာမအာရုံ၊ ကမ္မဋ္ဌာန်းအာရုံနှင့် ဗုဒ္ဓစိတ်ပညာ

အလိုရှိအပ်သော တရား (အာရုံ၊ အရာဝတ္ထု၊ ဝတ္ထုကာမ၊ ကာမဂုဏ်၊ ကာမဘုံ) နှင့် အလိုရှိတတ်-လိုချင်တတ်-သောတရား (ကိလေသကာမ=လောဘ၊ ဆန္ဒ) နှစ်မျိုးလုံးကို ကာမ ဟု ခေါ်ဆိုကြောင်း အဘိဓာန်တို့က ဖွင့်ဆို၏။ ထိုတွင် လိုချင်မှု ကာမနှင့်စပ်သော အဆင်း၊ အသံ၊ အနံ့၊ အရသာ၊ အတွေ့အထိ အာရုံ ငါးပါးလုံးကို ဝတ္ထုကာမ (သို့မဟုတ်) ကာမအာရုံဟုခေါ်၏။ ထိုကာမအာရုံတို့ကို ခံစားချင်တတ်သော တဏှာလောဘကို ကိလေသကာမဟု ခေါ်၏။ ကာမတဏှာမကင်းသေးသော သတ္တဝါတို့တွင် အထူးသဖြင့် ကာမဘုံ၌ကျင်လည်ခိုက်ဖြစ်သော ကာမသတ္တဝါတို့သည် များသောအားဖြင့် ကာမအာရုံကို ခံစားလိုကြသည်သာဖြစ်လေသည်။

ခံစားလိုသမျှ ကာမအာရုံကို ကျေနပ်အားရသည်အထိ ခံစားရလျှင် သတ္တဝါတို့၏ စိတ်သည် ကြည်ရွှင်ခြင်းသို့ ရောက်၏။ ထိုသဘောကို စာပေက သောမနဿ ဟု ဆို၏။ အားရအောင် မခံစားရလျှင် မရွှင်ပျခြင်းသို့ ရောက်၏။ ထိုသဘောကို ဥပေက္ခာ ဟု ဆို၏။ တခါတရံတွင်မူ တနုံ့နုံ့မှသည် ပေါက်ကွဲသည် အထိ ဖြစ်တတ်၏။ ထိုသဘောကို ဒေါမနဿ ဟု ခေါ်ဆိုလေသည်။

ထိုတွင် ကာမအာရုံကို အားရအောင် ခံစားခွင့်မရဟူရာ၌လည်း...

(က) မိမိခံစားလိုသော အာရုံကို လုံလောက်စွာ မရရှိ၍ (ရတာမလို/ လိုတာမရ၍)။
(ခ) ကာမအာရုံတွေကို အလိုရှိသလောက် ရနိုင်ပါလျက်၊ မိမိဖက်က ခံစားနိုင်သည့် ရုပ်ပိုင်းစွမ်းရည် ချို့တဲ့၍ (အစစပြည့်စုံပါသော်လည်း ကျန်းမာရေးမကောင်း၍)
(ဂ) တစ်စုံတစ်ဦး၏ အုပ်ထိန်းမှုအောက်သို့ ကျရောက်သွားရသည့်အတွက် မိမိ၏ကာမဆန္ဒကို အကောင်အထည်ဖော်ခွင့် မရ၍ (စည်းမျဉ်းတစ်ခုခုဖြင့် ကန့်သတ်ခံထားရ၍) ဟူ၍ အခြေအနေ အမျိုးမျိုး ကွဲပြားနိုင်လေသည်။

မည်သို့ဆိုစေ ကျန်းမာသန်စွန်း၍ ကာမဂုဏ်ခံစားလိုသော စိတ်ဆန္ဒလည်း ထက်သန်နေသူ ကာမသတ္တဝါတစ်ဦးအဖို့ ကာမအာရုံကို လုံလောက်စွာ ခံစားခွင့်မရသောအခါ ကိုယ့်ကိုယ်ကိုလည်း မကျေနပ်၊ ပတ်ဝန်းကျင်ကိုလည်း မကျေနပ်သော သဘောတစ်မျိုး ကြီးစိုးလွှမ်းမိုး လာတတ်လေသည်။ ထိုသဘောကို မိမိ၏လက်ရှိအနေအထားနှင့် မိမိဝန်းကျင်ကို မကျေနပ် မနှစ်မြို့မှု သဘော (disaffection) ဟု ခေါ်ဆိုလေသည်။ ထိုတွင် အချို့မှာ မိမိ၏မကျေနပ်မှုကို ကြမ်းကြမ်းတမ်းတမ်း ဖော်ထုတ်တတ်ကြပြီး၊ တစ်စုံတစ်ခု တစ်ဦးတစ်ယောက်ကို မကျေနပ်၍ လက်စားချေတတ်သူ (avenger) များအဖြစ်သို့တိုင် ဆိုက်ရောက်သွားတတ်လေသည်။ ထိုသို့ လက်စားချေလိုမှုသဘော (revenge, a desire for vengeance) မျိုးကို  မိမိ၏အိမ်ထောင်ရေး၊ အချစ်ရေး၊ စီးပွါးရေး၊ ဂုဏ်သိက္ခာအရေးကို ဖြိုခွဲဖျက်ဆီးခံရသူ အများစုတွင် အတွေ့ရများတတ်လေသည်။

အချို့မှာမူ ကာမအာရုံအပေါ် အလိုမပြည့်သောအခါ ကြမ်းကြမ်းတမ်းတမ်း မဟုတ်ဘဲ၊ စိတ်အားညှိုးငယ်သကဲ့သို့ဖြစ်လာပြီးလျှင် မှိုင်တွေငေးမော စိတ်သောကများ ဖိစီးနှိပ်စက်ကာသာ နေတတ်ကြလေသည်။ ထိုသဘောကို စိတ်ကျရောဂါ (depression) ဟု ခေါ်ဆို သတ်မှတ်နိုင်လေသည်။ ထိုစိတ်ရောဂါ စွဲကပ်ခံရသူများမှာ အိပ်လည်းဒီစိတ် စားလည်းဒီစိတ် ဟူသကဲ့သို့ ဖြစ်ရှိနေပြီး ကောင်းစွာလည်း အိပ်မပျော် ကောင်းစွာလည်း စားမဝင် ဖြစ်လာပြီးလျှင် နောက်ဆုံး၌ တဖြည်းဖြည်း ပိန်ချုံးချည့်နဲ့ လာတတ်လေသည်။ ထိုသဘောကို တစ်စုံတစ်ယောက်အပေါ်တွင် မလွန်ဆန်ဝံ့သူ၊ မိမိဆန္ဒသဘောကို ပွင့်ပွင့်လင်းလင်းပြောဆိုရန် ဝန်လေးတတ်သူ၊ အားတုန့်အားနာဖြစ်တတ်သူ များတွင် အတွေ့ရများတတ်လေသည်။ ဤစာရင်းတွင် ကာမသတ္တဝါ လူပုဂ္ဂိုလ်များသာမက၊ အချို့သော သာမန် ပုထုဇဉ် ရဟန်း သာမဏေ သူတော် သီလရှင်များပါ ပါဝင်နိုင်လေသည်။ 

ဤနေရာတွင် လူပုဂ္ဂိုလ်များအနေဖြင့် ကာမဖြင့်ပူလောင်မူ ပူလောင်သင့်သည် ရှိစေ၊ ရဟန်း သာမဏေများအနေဖြင့်မူ ကာမဖြင့် မပူလောင်သင့်သည် မဟုတ်ပါလောဟု စောဒက တက်ဖွယ်ရာ ရှိလေသည်။ စင်စစ် လူဖြစ်စေ ရဟန်းဖြစ်စေ ကာမဘုံသား သတ္တဝါများအဖို့ရာမှာ ကာမအာရုံကို အာရုံပြုလျှင်ပြု၊ မပြုလျှင် ကမ္မဋ္ဌာန်းအာရုံတစ်ခုခုကို အာရုံပြု၍ နေသင့်ကြ သည်သာ ဖြစ်လေသည်။ ဗုဒ္ဓစိတ်ပညာသဘောအရ ကာမအာရုံကို အာရုံပြုဖို့ရာလည်း အခက်အခဲ အကန့်သတ်ခံထားရ၊ ကမ္မဋ္ဌာန်းအာရုံတစ်ခုခုကို အာရုံပြုရန်လည်း မစွမ်းနိုင်ဟုဆိုလျှင် လူဖြစ်စေ ရဟန်းဖြစ်စေ မည်သူမဆို အလိုမပြည့်မှုကြောင့် ကာမပူ ပူလောင်ကြရသည်သာ ဖြစ်လေသည်။ ထိုသဘောကို ညီတော်မင်းနန် ဇာတ်ကြောင်းတွင် ထင်ရှားစွာတွေ့မြင်နိုင်ကြသည်သာ ဖြစ်လေသည်။

ညီတော်မင်းနန်

ညီတော်မင်းနန်သည် မြတ်စွာဘုရား၏ မိထွေးတော် မဟာပဇာပတိဂေါတမီ၏ သားတော်ဖြစ်ပြီး မြတ်စွာဘုရားအောက် အသက်အားဖြင့် (၃) ရက်သာ ငယ်ရွယ်သူဖြစ်လေသည်။ သူသည် မြတ်စွာဘုရားရှင် ဘုရားအဖြစ်ကို ရောက်တော်မူပြီးနောက် ကပိလဝတ်နေပြည်တော်ကို ပထမဦးဆုံး ပြန်လည်ကြွရောက်တော်မူပြီး (၃) ရက်မြောက်နေ့၊ သူ၏လက်ထပ်မင်္ဂလာ အခန်းအနားအပြီးတွင်ပင် ဘုရားရှင်ကို အားနာသဖြင့် ရဟန်းဖြစ်လာရသူလည်း ဖြစ်လေသည်။

ထိုနေ့က မြတ်စွာဘုရားရှင်သည် နန်းတော်ထဲ၌ အနုမောဒနာတရား ဟောကြားတော်မူပြီး နန္ဒမင်းသားကို သပိတ်တော်ကို ကိုင်ဆောင်စေပြီးလျှင် ကျောင်းတော်သို့ ပြန်ကြွတော်မူလေသည်။ နန္ဒမင်းသားလည်း သပိတ်တော်ကို ပွေ့ချီယင်း ဘုရားရှင်နောက်တော်ပါးက လိုက်ပါရလေသည်။ ဇနီးသည်ဖြစ်သော ဇနပဒကလျာဏီမင်းသမီးလည်း “အရှင်မ.. မြတ်စွာဘုရားသည် နန္ဒမင်းသားကို အရှင်မတို့နှင့် ကင်းကွာအောင် ပြုလုပ်ရန် ခေါ်ဆောင်၍ ကြွသွားတော်မူပါပြီ” ဟူသော ရံရွေတော် တို့၏ လျှောက်တင် ချက်ကြောင့်၊ ခေါင်းလျှော်ပြီးကာစ ရေစိုနေသော ဆံပင်တို့ကို တဝက်တပျက် ဖြီးလိမ်းလျက်က ကမန်းကတန်း ထလာပြီးလျှင် “အိုအရှင့်သား.. မြန်မြန်ပြန်လာတော်မူခဲ့ပါ” ဟု မှာကြားလိုက်ရှာလေသည်။ ထိုစကားသည်ကား နန္ဒမင်းသား၏ နှလုံးသား၌ တည့်တည့်ကြီးစူးဝင်၍ တည်လေသည်။

မြတ်စွာဘုရားရှင်သည် ကျောင်းတော်သို့ရောက်သောအခါ “နန္ဒ.. ရဟန်းပြုမည်လော” ဟုမေးတော်မူလျှင် ဘုရားရှင်အပေါ်၌ အလွန်ရိုသေလေးစားသဖြင့် “ရဟန်းမပြုနိုင်ပါ” ဟု မလျှောက်ထားဝံ့ဘဲ၊ “ကောင်းပါပြီ နောင်တော်မြတ်ဘုရား.. ရဟန်းပြုပါမည်” ဟု လျှောက်ဆိုဝန်ခံရှာလေသည် ။  မြတ်စွာဘုရားရှင်လည်း နန္ဒမင်းသားကို ရဟန်းတို့လက်သို့ အပ်နှံကာ ရဟန်းပြုပေးစေလေသည်။ 

ရဟန်းဘဝ

ရဟန်းဘဝဟူသည် ကာမအာရုံကိုတတ်နိုင်သမျှ ခွါရှောင်၍ ကမ္မဋ္ဌာန်းအာရုံ၌ မွေ့လျော်ပျော်ပိုက်ရသော ဘဝမျိုးဖြစ်၏။ ကာမအာရုံတို့၌ တပ်မက်ခြင်း၏အပြစ်၊ ကာမအာရုံတို့ကို ရှောင်ခွါရှောင်၏အကျိုး၊ ကမ္မဋ္ဌာန်းအာရုံ၌ မေ့လျော့ခြင်း၏အပြစ်၊ ကမ္မဋ္ဌာန်းအာရုံ၌ မွေ့လျော်ခြင်း၏ အကျိုးတို့ကို ဘုရားရှင်သည် နေ့စဉ်မပြတ် ဆုံးမဟောကြားတော်မူ၏။ လိုက်နာကျင့်သုံးကြကုန်သော ရဟန်းတို့သည် အတိတ်ကံ နှင့် ပစ္စုပ္ပန် သဒ္ဓါ၊ ဝီရိယ၊ သတိ၊ သမာဓိ၊ ပညာအရှိန်အားလျော်စွာ ကိလေသကာမ (ကာမဂုဏ်အာရုံကိုတပ်မက်သောစိတ်၊ တဏှာ လောဘ) မှ သူ့အတိုင်းအတာနှင့်သူ လွတ်မြောက်ကြလေသည်။ ကာမအာရုံကို ခံစား၍ ချမ်းသာသော ဝေဒယိတသုခမှသည်  ငြိမ်းအေးမှု သန္တိသုခကို ပြောင်းလဲခံစားခွင့် ရရှိကြလေသည်။ 

ရဟန်းသစ်ဖြစ်သူ အရှင်နန္ဒကား ကမ္မဋ္ဌာန်းအာရုံ၌ သူ့စိတ်ကို မပျော်မွေ့စေနိုင်။ ရဟန်းဖြစ်သည့်နေ့မှစ၍ နှမတော် ဇနပဒကလျာဏီ မှာကြားပြောဆိုလိုက်သည့် “အိုအရှင့်သား.. မြန်မြန်ပြန်လာတော်မူခဲ့ပါ” ဟူသော စကားကိုသာ ထပ်ခါထပ်ခါ အမှတ်ရနေမိ၏။ ထိုစကားကို ကြားယောင်မိလေတိုင်း ဇနပဒကလျာဏီသည် အနီးသို့ရောက်ရောက်လာသယောင် ထင်မိ၏။ အရှင်နန္ဒသည် သာသနာတော်၌ မပျော်တော့။ သာသနာတော်မှ ချထားပေးသော ကမ္မဋ္ဌာန်းအာရုံ၌ သူ့စိတ်ကို ထိန်းမထားနိုင်တော့။ တနည်းအားဖြင့် သာသနာတော်မှ တည်ခင်းထားပေးသော ကမ္မဋ္ဌာန်းအာရုံများကို မြည်းစမ်း၍ပင် မကြည့်ချင်တော့။ နောက်ဆုံး ကာမအာရုံကို မည်သို့မျှ ဖြတ်တောက်၍ မရနိုင်တော့သည့်အခါ နိဂြောဓာရုံကျောင်းတိုက်မှပင် ထွက်ပြေးမိရှာလေသည်။

မည်သို့ဆိုစေ၊ အရှင်နန္ဒ၌ ဘုရားရှင်အပေါ်၌ အလွန်ရိုသေလေးစားသောစိတ်သည် ရှိ၏။ ထွက်ပြေး၍ ကျောင်းဝင်းအပြင်ဖက် ချုံဖုတ်တစ်ခု သစ်ပင်စုတစ်ခု မျှလောက်ကို ကျော်လွန် မိလျှင်ပင် မြတ်စွာဘုရားရှင်သည် မိမိ၏ရှေ့၌ ရပ်တည်တော်မူလာသကဲ့သို့ ထင်မိလေသည်။ ထိုအခါ မီး၌ပစ်ချခြင်းခံလိုက်ရသော ကြက်တောင်ပမာ တွန့်ဆုတ်သွားပြီးလျှင် မိမိနေရာကျောင်းသို့ ပြန်လှည့် ဝင်ပြန်ရှာလေသည်။ ကာမအပူလောင်ခြင်းကို အပြင်းအထန် ခံစားရရှာခြင်းနှင့် တစ်စုံတစ်ဦးကို မလွန်ဆန်ဝံ့၊ မိမိစိတ်ဆန္ဒကို ပွင့်ပွင့်လင်းလင်း ထုတ်ပြောရန် ဝန်လေးတတ်သူများ ကြုံတွေ့ရလေ့ရှိသော နမူနာပြယုဂ်ပေတည်း။


ကမ္မဋ္ဌာန်းအာရုံ၌ မွေ့လျော်တော်မူစေခြင်း (သို့ဟုတ်) ဗုဒ္ဓ၏စိတ်ပညာစွမ်း

ထိုအခါ မြတ်စွာဘုရားရှင်သည် “နန္ဒရဟန်းသည် အလွန်ပင် မေ့မေ့လျော့လျော့ နေဘိ၏၊ သာသနာတော်၌ မမွေ့လျော်ခြင်းကို ပယ်ဖျောက်ခြင်းငှါ မစွမ်းနိုင်ရှာ၊ ငါဘုရားသည် နန္ဒရဟန်း၏ စိတ်ငြိမ်းချမ်းမှုရအောင် ပြုမှ သင့်တော်မည်” ဟု ကြံစည်ဆင်ခြင် တော်မူပြီးလျှင် နတ်ပြည်သို့ ခေါ်ဆောင်၍ နတ်တို့၏အဆင်းရုပ်ဝါ စည်းစိမ်ချမ်းသာ တို့ကို ပြသတော် မူလေသည်။ ထိုသို့ နတ်ပြည်သို့ ခေါ်ဆောင်ပြသတော်မူသောအခါ၌လည်း တိုက်ရိုက်ကြွသွားတော်မူကြသည်မဟုတ်ပဲ လမ်းခရီးအကြား မီးလောင်ထားသည့်လယ်ကွက်အတွင်း မီးလောင်ထားသည့် သစ်ငုတ်တစ်ခုထိပ်၌ နား, နှာခေါင်း, အမြီးများ မီးသင့်ထား၍ စုတ်ပြတ်ရွတ်တ အိုမင်းလွန်းလှပြီဖြစ်သော မျောက်အိုမကြီး တစ်ကောင်ကို မြင်စေတော်မူပြီးမှ တာဝတိံသာနတ်ပြည်သို့ တက်ကြွတော်မူလေသည်။

ဤနေရာတွင် ဘုရားရှင်သိစေတော်မူခဲ့သော စိတ်ပညာကုထုံး (Psychotherapy) သဘောကို နားလည်အောင် ကြိုးစားသင့်ကြပါ၏။ စင်စစ် ရွှေနန်းတော်၌ ချမ်းချမ်းသာသာ ကြီးပြင်းလာရသော အရှင်နန္ဒသည် ဇနပဒကလျာဏီကဲ့သို့သော အချောအလှ များကိုသာ မြင်ခဲ့ရဖူးသူဖြစ်ပြီး၊ လယ်ကွက်ကြားက မျောက်အိုမကဲ့သို့သော စုတ်ပြတ်ရွတ မလှသည့်အသွင် အမြင်မကောင်းသည်များကို မြင်ဖူးခဲ့ရသူမဟုတ်ပေ။ ထို့အပြင် လူတို့၏အမြင်သည် လူ့ဘောင်တွင်သာ ဆုံးသည် ဟူသကဲ့သို့ အဘိညာဏ်ကဲ့သို့သော တန်ခိုးပါဝါမရှိသေးသူ သူ့အဖို့ နတ်ပြည်လောကစသည့် အထက်အထက် တိုးတက်၍ နှစ်သက်ဖွယ် ကာမအာရုံဆန်းများကို မြင်ဖူးသေးသူလည်း မဟုတ်ပေ။ မျောက်အိုမ၊ ဇနပဒကလျာဏီ နှင့် နတ်သမီးများကို အစဉ်အတိုင်း အဆိုး၊ အကောင်း၊ ပို၍သာ၍ကောင်းဟု အဆင့်သတ်မှတ်မည်ဆိုလျှင် အရှင်နန္ဒမြင်ဖူးသည်မှာ ကောင်းသည်ဆိုသော အလယ်အလတ်အာရုံတစ်မျိုးတည်းမျှသာ ဖြစ်လေသည်။ သူ့တွင် နှိုင်းယှဉ်စဉ်းစားစရာ အခြားအာရုံ (Comparative objects) မရှိခဲ့ခြင်းသည်လည်း ဇနပဒကလျာဏီအပေါ် တန်းတန်းစွဲ ဖြစ်နေခဲ့ရခြင်း၏ အခြေခံကျသော အကြောင်းတရားတစ်ခု ဖြစ်လေသည်။

ထို့ကြောင့် ဗုဒ္ဓစိတ်ပညာကုထုံးအရ “ဒါဆိုမှဒါ” တန်းတန်းစွဲဖြစ်နေသူများနှင့် ကြုံရသောအခါ နှိုင်းယှဉ် စဉ်းစားစရာ အာရုံအသစ်အဆန်းတစ်ခုခုကို ပေးသိစေခြင်းဖြင့် ထိုသူတို့၏ မူလကာမအာရုံအပေါ် တပ်စွဲခြင်းကြောင့် ဖြစ်ပေါ်နေသော အပူမီးကို ဦးစွာငြိမ်းသတ်ပေးကြရမည် ဖြစ်လေသည်။

ယခုအခါ အရှင်နန္ဒသည် သိကြားမင်းအားဖျော်ဖြေရန်လာကြရင်း ဘုရားရှင်အား ရှိခိုးရပ်တည်လာကြသည့် နတ်သမီးငါးရာတို့ကို မျက်ဝါးထင်ထင် တွေ့မြင်နေရပြီဖြစ်လေသည်။ သူ့စိတ်ထဲ စူးနစ်နေသော ဇနပဒကလျာဏီသည် ဤနတ်သမီးငါးရာ တို့ကို ထောက်ဆလျှင် လမ်းခရီး၌တွေ့ခဲ့ရသော မျောက်အိုမကြီးပမာ ဟူ၍သာ ထင်မြင်ယူဆမိတော့သည်။ ထိုအခိုက် ဘုရားမြတ်စွာက “နန္ဒ၊ သာသနာတော်၌ ပျော်ရွှင်စွာနေလော့၊ ခိုခြေအဆင်းရှိသည့် နတ်သမီးငါးရာတို့ကို ရဖို့ရန်အတွက် ငါဘုရားအာမခံ (တာဝန်ယူ) ၏” ဟု မိန့်ကြားတော်မူလိုက်၏။ အရှင်နန္ဒ၏ ဝမ်းသာလုံးကား အဆုံးမရှိပြီ။ “မြတ်စွာဘုရား..၊ မြတ်စွာဘုရားသည် တပည့်တော်အတွက် ခိုခြေအဆင်းရှိသည့်နတ်သ္မီး ငါးရာတို့ကို ရဖို့ရန် အာမခံနိုင်ပါမူ တပည့်တော်သည် သာသနာတော်ဝယ် ဘုရားရှင့်အထံတော်၌ ပျော်ရွှင်စွာ နေပါတော့မည်” ဟု အပေးအယူစကား ပြန်ကြားလိုက်လေသည်။

ဤနေရာတွင် “မြတ်စွာဘုရားသည် အရှင်နန္ဒကို သာသနာတော်၌ မြတ်သောအကျင့်ကို ကျင့်သုံး၍နေစေလိုပါလျက်၊ နတ်သမီးများနှင့် အတူတကွနေရခြင်း မမြတ်သောအကျင့် အဗြဟ္မစရိယဝါသ အလို့ငှါ အဘယ်ကြောင့် အာမခံတော်မူပါသနည်း” ဟု စောဒကတက်စရာရှိလာ၏။ ထိုစောဒကို “ဇနပဒကလျာဏီတည်းဟူသော အာရုံ၌ ကာလကြာမြင့်စွာ အခိုင်အမာ ကျရောက်နေသော ရာဂကိလေသာကို အာဂန္တုကဖြစ်သည့် နတ်သမီးအာရုံ၌ ပြောင်းရွှေ့ပေးမှသာ အလွယ်နှင့် စွန့်နိုင်မည် ဖြစ်သောကြောင့် နတ်သမီးများနှင့်စပ်၍ အာမခံတော်မူသည်” ဟု ဆရာတို့ ဖြေဆိုတော် မူကြလေသည်။ ထိုအချက်ကို မဟာဗုဒ္ဓဝင်ကျမ်းပြု တိပိဋကဓရမင်းကွန်းဆရာတော်ဘုရားကြီးက “မြတ်စွာဘုရားရှင်၏ တရားဟောစဉ် (တရားတော်ဒေသနာတော်ဟောနည်းအစဉ်) = အနုပုဗ္ဗိကထာ၌၊ သဂ္ဂကထာ= နတ်ရွာချမ်းသာနှင့် စပ်သော တရားစကား ဟောကြားတော်မူခြင်းမှာ ဤအနက်အဓိပ္ပါယ်အတွက် သက်သေသာဓကဖြစ်သည်” ဟု အထူးမှတ်ချက်ပြုတော်မူထားခဲ့လေသည်။


ကမ္မဋ္ဌာန်းအာရုံကိုယူပြီ

ယခုအချိန်တွင် အရှင်နန္ဒ၏ စိတ်၌ ဇနပဒကလျာဏီ မရှိတော့ပြီ။ နတ်သမီးများသာ ရှိတော့၏။ ထိုနတ်သမီးများကို ရနိုင်ဖို့ရန်လည်း ဘုရားရှင်ကိုယ်တော်တိုင်က အာမခံပေးထား၏။ မရနိုင်မည်ကို စိုးရိမ်ဖွယ်မရှိပြီ။ သူလုပ်ရမည်ကား ကမ္မဋ္ဌာန်းတရား အားထုတ်ရုံသာ ရှိတော့၏။ သူ့တာဝန်ကျေပွန်လျှင် ဘုရားရှင်ဘက်က ချွတ်ယွင်းစရာအကြောင်းမရှိပြီ။ ထို့ကြောင့် ရွှင်လန်းတက်ကြွစွာဖြင့် နေ့ညဆက်ကာ ရဟန်းတရားကို ပွါများအားထုတ်လေတော့သည်။

ဤနေရာတွင် ဗုဒ္ဓစိတ်ပညာကုထုံးကို လေ့လာသူများအနေဖြင့် အရှင်နန္ဒ၏စိတ်သည် ဇနပဒကလျာဏီတည်းဟူသော ကာမအာရုံကို အကြောင်းခံခဲ့စဉ်တုန်းက ပူလောင်မှုဖြင့်သာ လောင်ကျွမ်း ခဲ့ရသော်လည်း၊ နတ်သမီးတည်းဟူသော ကာမအာရုံအသစ်ကို အကြောင်းခံလိုက်သောအခါမူ ရွှင်လန်းတက်ကြွသည့်သဘော သောမနဿအရှိန်အဝါ ဝင်ရောက်လာပြီးလျှင် ကမ္မဋ္ဌာန်းအာရုံ၌ သူ့စိတ်ကို ထားနိုင်ခဲ့ပုံကို မြင်မိအောင် ကြည့်ကြရမည်သာ ဖြစ်လေသည်။

အရှင်နန္ဒသည် စိတ်ကို ကမ္မဋ္ဌာန်အာရုံ၌ တည်စေနိုင်ခဲ့ပြီကား သေချာသွားပြီ ဖြစ်သော်လည်း၊ သူ၏ ဦးတည်ချက်ကား နတ်သမီးရရေးပင် ဖြစ်နေသေးသည်။ တနည်းဆိုရလျှင် အရှင်နန္ဒသည် မဂ္ဂင်ဖောင်ပေါ်သို့ တက်ရောက်လှော်ခတ်နေပြီ မှန်သော်လည်း၊ ဦးတည်ချက်ကား မမှန်သေး။ သူ၏ ဦးတည်ချက်ကား လွတ်မြောက်မှု ဝိမုတ္တိသို့ မဟုတ်သေး၊ အနှောင်အဖွဲ့ခံရေးသို့ပင် ဦးတည်နေပေသေး၏။ ဘုရားမြတ်စွာသည် သူ၏ ဦးတည်ချက်ကို ပြင်ပေးရန်အတွက် ရှေ့တဆင့်တိုး စီမံတော်မူပြန်လေသည်။

“အရှင်နန္ဒသည် နတ်သမီးတို့ကို ရလိုမှုကြောင့် မြတ်သောအကျင့်ကို ကျင့်နေသတဲ့၊ ထိုအရှင်နန္ဒအတွက် နတ်သမီးငါးရာ ရစိမ့်မည့်အကြောင်း မြတ်စွာဘုရားက အာမခံပေးတော်မူထားရသတဲ့၊  အရှင်နန္ဒဟာ ကြေးစားကြီးပါပဲ၊ အရှင်နန္ဒဟာ အဝယ်တော်ကြီးပါပဲ” ဟူသော သီတင်းသုံးဖော်များ၏ ကျီစယ်လှောင်ပြောင်သံများကို အရှင်နန္ဒကြားလာရ၏။ ရှက်လာမိ၏။ သူ့အလုပ် မဟုတ်သေးပုံများကို မြင်လာမိ၏။ ဣနြေ္ဒတို့ကို ရှေးကထက်ပို၍ စောင့်ထိန်းဖြစ်လာ၏။ ဤသို့ဖြင့် အရှေ့ အနောက် တောင် မြောက် အထက် အောက် ဖီလာ အထောင့်ဟူသော အရပ်မျက်နှာတို့ကို ကြည့်ရှုတော်မူလိုလျှင် လောဘ ဒေါသ စသော အကုသိုလ်တရားများ မဖြစ်ပွါးရအောင် သတိ, သမ္ပဇဉ် အမြဲယှဉ်၍ ကြည့်ရှုတော်မူခြင်းတည်းဟူသော ဣန္ဒြိယသံဝရ ဥက္ကဌ်ပဋိပတ်ကို ကျင့်ကြံတော်မူလျက် ရဟန်းတရားကို ပွါးများကြိုးကုတ် အားထုတ်တော်မူလေရာ မကြာမြင့်မီပင် အာသဝေါကုန်ခန်း၍ ရဟန္တာအဖြစ်သို့ ရောက်တော်မူလေသည်။

ဤနေရာတွင် ဤဆောင်းပါးကို နိဂုံးချုပ်သင့်ပြီ ဖြစ်၏။ နိဂုံးချုပ်ဆိုရလျှင် ကာမသတ္တဝါတို့မည်သည် များသောအားဖြင့် ကာမအာရုံတစ်ခုခုအပေါ် တပ်မက်စွဲလန်းသောစိတ်ဖြင့် ပူလောင်ညှိုးနွမ်းနေရသူ များသာ များပါ၏။ စိတ်အစဉ်သည် ကာမအာရုံတို့အပေါ် တပ်မက်ပူလောင်မှုကြောင့် ညစ်ထေးခြင်းသို့ ရောက်ရ၏။ ထို့ကြောင့်ပင် “ကာမသတ္တဝါ၊ ကာမရွာ၌၊ ကာမာရမ္မဏ၊ ကာမသဘော၊ ကာမဇောဖြင့်၊ တပ်လောဘစိတ်၊ ပိတ်မှုမသိ၊ ညစ်ညူးဘိ၏” ရှေးသူတော်ကောင်းများ စပ်ဆို ဆုံးမတော်မူခဲ့ကြခြင်းဖြစ်၏။ မိမိကိုယ်တိုင် ထိုအဖြစ်မျိုး ကြုံလာရသော အခါ၌လည်းကောင်း၊ ထိုအဖြစ်မျိုး ကြုံတွေ့ခံစားနေရသူ အခြားသူများ၏ အပူမီးကို ကူညီငြိမ်းသတ်ပေးရန် လိုအပ်လာသောအခါမျိုး၌လည်းကောင်း ဤဆောင်းပါး၌ လေ့လာတွေ့ရှိခဲ့ကြရပါသော ဗုဒ္ဓစိတ်ပညာကုထုံး (Buddhist Psychotherapy) များကို အတိုင်းအတာ တစ်ခုအထိ အသုံးချနိုင်ကြလိမ့်မည်ဟု မျှော်လင့်ရပါသည်။ ဦးတည်ချက်မှန်မှန်ဖြင့် ကမ္မဋ္ဌာန်းအာရုံတစ်ခုခုကို လက်ကိုင်ပြုကာ အပူခပ်သိမ်းမှ လွတ်ငြိမ်းအောင် ကြိုးစားတော်မူနိုင်ကြပါစေသတည်း။

ကျမ်းကိုး။   ။ နိုင်ငံတော်ဗုဒ္ဓသာသန မဟာဗုဒ္ဓဝင်၊ တတိယတွဲ၊ ဆဋ္ဌမတွဲ


မေတ္တာဖြင့်
အရှင်ဝိသာရဒ (ရမ္မာဝတီ)
29/06/2013

Friday, May 24, 2013

"ဓမ္မပူဇာဆိုတာ ဘယ်လို ပူဇော်တာပါလိမ့်"


ခုဒ္ဒကပါဌအဋ္ဌကထာ၊ မင်္ဂလသုတ်အဖွင့်၌ပူဇာဟူသည်ကို “ပူဇာတိ သက္ကာရဂရုကာရ မာနနဝန္ဒနာ- ပူဇာဟူသည် ကောင်းစွာပြုခြင်း၊ အလေးအမြတ်ပြုခြင်း၊မြတ်နိုးတနာပြုခြင်း၊ ရှိခိုးခြင်းတည်း” ဟု ဖွင့်ဆိုပြထားပေသည်။ ထို့ကြောင့် အာမိသဖြင့် ကောင်းစွာပြုခြင်း၊ အလေးအမြတ်ပြုခြင်း ၊မြတ်နိုးတနာပြုခြင်း၊ ရှိခိုးခြင်းများကို ‘အာမိသပူဇာ’ ဟု လည်းကောင်း၊ ဓမ္မဖြင့် ကောင်းစွာပြုခြင်း ၊အလေးအမြတ်ပြုခြင်း၊ မြတ်နိုးတနာပြုခြင်း၊ ရှိခိုးခြင်းများကို ‘ဓမ္မပူဇာ’ ဟုလည်းကောင်းအကျဉ်းအားဖြင့် မှတ်သားနိုင်ကြပြီ ဖြစ်ပါသည်။


"အာမိသပူဇာ"

ထိုတွင် အာမိသဟူသည်ပစ္စည်းလေးပါး၊ လာဘ်လာဘ၊ တံစိုးလက်ဆောင်၊ ကိလေသာကာမ၊ ကိလေသာတို့ဖြင့် သုံးသပ်အပ်သောအရာတို့ဟူ၍ဆရာမြတ်တို့က ဖွင့်ဆိုရှင်းပြတော်မူကြ၏။ ထို့ကြောင့်.. အပူဇော်ခံပုဂ္ဂိုလ်တို့အား ပန်း၊ရေချမ်း၊ ဆီမီး၊ အဝတ်အထည်၊ စားသောက်ဖွယ်ရာ ငွေကြေးဝတ္ထု စသည့် အာမိသပစ္စည်းတို့ဖြင့် မြတ်နိုးတနာပြု၍ ပေးလှူခြင်း စသည်ကို အာမိသပူဇာ ဟုခေါ်ဝေါ်ရလေသည်။ ယနေ့ခေတ်တွင် အသုံးတွင် ခေတ်စားနေသော တရားဟောပုဂ္ဂိုလ်တို့အား ကပ်လှူသည့် နဝကမ္မစာအိတ်ကြီးငယ် စသည်တို့သည်ကား အများသိမှတ်နေကြသကဲ့သို့ ဓမ္မပူဇာစစ်စစ် မဟုတ်မူ၍၊့ အာမိသပူဇာ စာရင်းဝင်တို့သာ ဖြစ်ကြလေသည်။

ဤနေရာတွင် ပူဇာဟူသောစကားကို သက္ကာရနှင့် ဂါရဝ ဟူသော စကားတို့ဖြင့် ယှဉ်တွဲကြည့်လျှင် ပို၍ နားလည်ဖွယ်ရာရှိ၏။   မှန်၏။  ပါရာဇိကဏ်အဋ္ဌကထာ၌ အောက်ပါအဓိပ္ပါယ်ကို ဖွင့်ဆိုထား သည်ကို တွေ့ရ၏။

- အာမိသဖြင့်တစ်စုံတစ်ယောက်အား ပူဇော်ကြရာ၌ အပူဇော်ခံပုဂ္ဂိုလ်အားကား အလေးအနက်မထားဘဲ မိမိ၏လှူဖွယ်ပစ္စည်းကိုသာကောင်းစွာပြင်ဆင် လှူဒါန်းလျှင်၊ ၎င်းကို ‘သက္ကာရ’ ဟု ခေါ်၏။

- လှူဖွယ်ပစ္စည်းကိုကားကောင်းစွာပြင်ဆင်မှုမပြုဘဲ၊ အလှူခံ ပုဂ္ဂိုလ်ကိုသာ အလေးအမြတ်ပြုကာ ပေးကမ်း လှူဒါန်းလျှင်၊၎င်းကို ‘ဂါရဝ’ ဟုခေါ်၏။

- ထိုသက္ကာရ၊ ဂါရဝနှစ်ပါးနှင့် ပြည့်စုံစွာ ချစ်ခင်မြတ်နိုးခြင်းနှင့်တကွ ကောင်းစွာ ပြင်ဆင်စီရင်အပ်သော လှူဖွယ်ပစ္စည်းဖြင့် အလှူခံပုဂ္ဂိုလ်ကိုလည်း အလေးအမြတ် ပူဇော်ချီးမြှောက်ခြင်းကို‘ပူဇာ’ ဟု ခေါ်လေသည်။

ထို့ကြောင့် ကောင်းစွာပြင်ဆင်ထားအပ်သောလှူဖွယ်ဝတ္ထုတို့ဖြင့် အလှူခံပုဂ္ဂိုလ်တို့အား ချစ်ခင်မြတ်နိုးစွာ အလေးအမြတ်ပြု ပူဇော်ချီးမြှောက်လျှင်၊ ၎င်းကို‘အာမိသပူဇာ’ ဟု ခေါ်ရလေသည်။


“ဓမ္မပူဇာ”

‘ဓမ္မပူဇာ’ ဟူသောစကားရပ်၌'ဓမ္မ'အရ မပြုကျင့်ဘဲ ရှောင်ကြဉ်ကြရမည်ဟု ပညတ်တော်မူ အပ်သည့် (ဝါရိတ္တ) သီလသိက္ခာပုဒ်တော်များ၊ လိုက်နာရမည်ဟု ပညတ်တော်မူအပ်သည့် ဆရာသမားတို့ အပေါ်၌ ပြုကျင့်ရာသော ဝတ္တရားများစသော စာရိတ္တသီလ(ခေါ်) အာစာရပညတ်တော်များ၊  ဓုတင်အကျင့်များ ၊ သောတာပတ္တိမဂ်၏ရှေ့ ဂေါတြဘုဉာဏ် တိုင်အောင်သောသမထ-ဝိပဿနာအကျင့်များကို ကောက်ယူရလေသည်။

မှန်၏။  ထို ရှောင်ကြဉ်ရမည့်သီလသိက္ခာပုဒ်တော်များ၊ ဖြည့်ကျင့်ရမည့် ဝတ္တရားကြီးငယ်များ၊ ဓုတင်အကျင့်မြတ်များနှင့်သမထ-ဝိပဿနာ အကျင့်မြတ်များသည် မဂ်လေးပါး၊ ဖိုလ်လေးပါးနှင့် နိဗ္ဗာန်တည်းဟူသော လောကုတ္တရာတရား ကိုးပါးအားလျော်ကန်ထိုက်တန်သည့် အကျင့် (ပုဗ္ဗဘာဂပဋိပဒါ) တို့ပင် ဖြစ်လေသည်။

ထို့ကြောင့် ‘ဓမ္မေနပူဇနာ ဓမ္မပူဇာ’ ဟူသည်နှင့်အညီ၊ ဘုရား တရား သံဃာ ရတနာသုံးပါးတို့အား လေးစားချစ်ခင်ကြည်ညိုသော အားဖြင့်ထို သီလသိက္ခာပုဒ်တော်များကို လိုက်နာခြင်း၊ ဝတ်ကြီးဝတ်ငယ်များကို ဖြည့်ကျင့်ခြင်း၊ဓုတင်အကျင့်မြတ်တို့ကို လိုက်နာကျင့်သုံးခြင်း၊ သမထ-ဝိပဿနာတရားတို့ကို ပွါးများအားထုတ်ခြင်းဟူသော အကျင့်-ဓမ္မဖြင့် ပူဇော်ခြင်းကိုပင် ‘ဓမ္မပူဇာ’  ဟု ခေါ်ရလေသည်။ လိုရင်းချုပ်၍ ဆိုရပါလျှင် ဘုရား တရားသံဃာ ရတနာသုံးပါးအပေါ် လေးစားချစ်ခင်သောအားဖြင့် ဗုဒ္ဓ၏အဆုံးအမ မြတ်ဓမ္မအတိုင်း လိုက်နာကျင့်သုံးနေထိုင်၍ပူဇော်ခြင်းကို ဓမ္မပူဇာ ဟု ခေါ်ရလေတော့သည်။


“ပူဇော်အထူးကို ခံယူတော်မူထိုက်သောမြတ်စွာဘုရား”

- လောကတွင် ရှိသမျှလူနတ်ဗြဟ္မာ သတ္တဝါတို့ကို ဧရာမနေရာကြီးတစ်ခုတွင် စုဝေးစေပြီး အပူဇော် အခံထိုက်ဆုံး ပုဂ္ဂိုလ်ကိုရွေးချယ်မည်ဆိုပါက ထိုပုဂ္ဂိုလ်သည် ဗုဒ္ဓရှင်တော်မှတပါး အခြားသူဖြစ်စရာ အကြောင်းမရှိပေ[အရဟံ]။

- အကြောင်းကား ဗုဒ္ဓသည်သာ လောဘ ဒေါသ မောဟ မာန ဒိဋ္ဌိ ဝိစိကိစ္ဆာ ထိန ဥဒ္ဓစ္စ အဟိရိကအနောတပ္ပ ဟူသော ကိလေသာတရားဆိုးတို့ကို ဝါသနာအငွေ့အသက်နှင့်တကွ ပယ်ဖြတ်တော်မူပြီးသောကြောင့်ပင်ဖြစ်လေသည် [အရ,ဟံ]။

- ဗုဒ္ဓ၏ ထိုသဘောသည်ကား လူရှေ့တွင်သာ ကိလေသာ ကင်းသယောင် ဟန်ဆောင်နေသည်မဟုတ်၊လူသူမရှိသည့် ဆိတ်ကွယ်ရာ၌လည်း ၎င်းအတူပင် မကောင်းမှုကို ပြုတော်မမူသည်သာ ဖြစ်လေသည် [အ,ရဟံ]။

- ထို့ကြောင့်ပင် ဗုဒ္ဓ၏ဂုဏ်ကျေးဇူးတော်တို့ကိုသိ၍ဗုဒ္ဓကို ချစ်ခင်ကြည်ညိုကြသူ တို့သည် ကျောင်းသင်္ကန်းဆွမ်းဆေးတို့ဖြင့် ပူဇော်ခြင်း အာမိသပူဇာဖြင့်လည်းကောင်း၊ဖော်ပြခဲ့ပြီးသော သိက္ခာပုဒ်တော်များကို လိုက်နာခြင်းစသော ဓမ္မပူဇာဖြင့်လည်းကောင်း ယနေ့တိုင်ပူဇော်လျက်ရှိကြလေသည်။


“အာမိသဖြင့်ပူဇော်ကြသော်လဲ…”

ထိုတွင် ဗုဒ္ဓသည် အာမိသပူဇာထက်ဓမ္မပူဇာကို ပို၍ နှစ်သက်တော်မူကြောင်းကို မဟာပရိနိဗ္ဗာနသုတ္တန်တွင် ကိုယ်တော်တိုင် အတိအလင်းဟောကြားတော်မူခဲ့လေသည်။ မှန်ပါ၏။ ဗုဒ္ဓသည် ဘုရားဖြစ်တော်မူသည်မှ (၄၅) နှစ်တာကာလပတ်လုံးဆုံးမထိုက်သမျှ ဝေနေယျတို့ကို ဆုံးမတော်မူ၍ လူနတ်နိဗ္ဗာန် သုံးတန်သောချမ်းသာကို ထိုက်တန်စွာရရှိစေတော်မူပြီးသည့်နောက် မလ္လာမင်းတို့၏ အင်ကြင်းဥယျာဉ်တော်ဝယ် မြောက်အရပ်သို့ ခေါင်းရင်းပြုကာခင်းထားအပ်သော သလွန်တော်မြတ်၌ ပရိနိဗ္ဗာန်ပြုတော်မူရန်အလို့ငှါ လက်ယာနံတောင်းဖြင့် မြတ်သောလျောင်းစက်ခြင်းကို ပြုတော်မူလေသည်။

ထိုရောအခါ ဗုဒ္ဓကိုကြည်ညိုကြကုန်သော နတ်ဗြဟ္မာအပေါင်းတို့သည် နတ်၌ဖြစ်သော ပန်း, နံသာတို့ဖြင့်လည်းကောင်း၊နတ်စောင်းပတ်သာ တူရိယာတို့ကို တီးခတ် သီဆိုကာဖြင့်လည်းကောင်း ဗုဒ္ဓကို ပူဇော်ကြလေသည်။ထိုအခါ ဗုဒ္ဓသည် အရှင်အာနန္ဒာကို ခေါ်တော်မူပြီးလျှင်…

“''အာနန္ဒာ အင်ကြင်းပင်အစုံတို့သည်အခါမဲ့ ပွင့်သောပန်းတို့ဖြင့် ပင်လုံးကျွတ်ပွင့်လျက် ရှိကုန်၏၊ ထို (အင်ကြင်းပင်)တို့သည် မြတ်စွာဘုရားကို ပူဇော်သည့်အနေဖြင့် ပန်းတို့ကို မြတ်စွာဘုရား၏ ကိုယ်တော်ထက်သို့ကြဲဖြန့်ကုန်၏၊ လွှမ်းလျက် ကြဲဖြန့်ကုန်၏၊ မပြတ်မစဲ ကြဲဖြန့်ကုန်၏။

မန္ဒာရဝမည်သော နတ်ပန်း (ထင်ရှားပန်း) တို့သည်လည်းကောင်းကင်မှ ကျလာကုန်၏၊ ထို (ပန်း) တို့ကိုလည်း (နတ်တို့သည်) မြတ်စွာဘုရားကို ပူဇော်သည့်အနေဖြင့်မြတ်စွာဘုရား၏ ကိုယ်တော်ထက်သို့ ကြဲဖြန့်ကုန်၏၊ လွှမ်းလျက် ကြဲဖြန့်ကုန်၏၊ မပြတ်မစဲကြဲဖြန့်ကုန်၏။

နတ်၌ဖြစ်သော စန္ဒကူးနံ့သာမှုန့်တို့သည်လည်း ကောင်းကင်မှကျလာကုန်၏၊ ထို (စန္ဒကူးနံ့သာမှုန့်) တို့ကိုလည်း (နတ်တို့သည်) မြတ်စွာဘုရားကိုပူဇော်သည့်အနေဖြင့် မြတ်စွာဘုရား၏ ကိုယ်တော်ထက်သို့ ကြဲဖြန့်ကုန်၏၊ လွှမ်းလျက်ကြဲဖြန့်ကုန်၏၊ မပြတ်မစဲ ကြဲဖြန့်ကုန်၏။

နတ်တူရိယာတို့ကိုလည်း မြတ်စွာဘုရားကိုပူဇော်သည့်အနေဖြင့် ကောင်းကင်၌ တီးမှုတ်လျက်ရှိကုန်၏။ နတ်သီချင်းသံတို့သည်လည်းမြတ်စွာဘုရားကို ပူဇော်သည့်အနေဖြင့် ကောင်းကင်၌ ဖြစ်ပေါ်လျက်ရှိကုန်၏။
အာနန္ဒာ ဤမျှလောက် (ပူဇော်မှု) ဖြင့် မြတ်စွာဘုရားကို အရိုအသေပြုသည် မမည်သေး၊အလေးပြုသည် မမည်သေး၊ မြတ်နိုးသည် မမည်သေး၊ ပူဇော်သည် မမည်သေး၊ ပသသည် မမည်သေး” ဟု မိန့်တော်မူ၏။


“ဓမ္မအကျင့်မြတ်ဖြင့် ပူဇော်ပါ”

ထို့နောက်ဗုဒ္ဓသည် “အာနန္ဒာအကြင်ရဟန်းဖြစ်စေ ရဟန်းမိန်းမဖြစ်စေ ဥပါသကာဖြစ်စေ ဥပါသိကာမ ဖြစ်စေ (လောကုတ္တရာ)တရားနှင့် လျော်သော တရားကိုကျင့်လျက်နေ၏၊ လျော်သော အကျင့်ကိုကျင့်လျက်နေ၏၊တရားနှင့်လျော်စွာ ကျင့်လျက်နေ၏၊ ထိုသူသည် အမြတ်ဆုံးပူဇော်ခြင်းဖြင့်မြတ်စွာဘုရားကို အရိုအသေပြုသည် မည်၏၊ အလေးပြုသည် မည်၏၊မြတ်နိုးသည် မည်၏၊ ပူဇော်သည် မည်၏၊ ပသသည် မည်၏” ဟု သူနှစ်သက်သော ပူဇော်ခြင်းကို အတိအလင်း မိန့်ကြားတော်မူလေသည်။


မှန်ပါ၏။ ဘုရားအလောင်းတော်မြတ်သည်ဒီပင်္ကရာမြတ်စွာဘုရားရှင်၏ ခြေတော်ရင်း၌ လဲလျောင်းတော်မူလျက် ရှစ်ပါးသောအကြောင်းအင်္ဂါပြည့်စုံစွာဖြင့် သဗ္ဗညုတဉာဏ်တော်ကို ဆုတောင်းတော်မူခဲ့သည်မှာ ပန်းနံသာတူရိယာဘုန်းတော်ဘွဲ့တေးသံသာများဖြင့် ပူဇော်ခံတော်မူလို၍ မဟုတ်ခဲ့ချေပြီ၊ အာမိသပူဇာဖြင့်အပူဇော်ခံယူတော်မူလို၍ ပါရမီတော်မြတ်တို့ကို ဖြည့်ကျင့်တော်မူခြင်း မဟုတ်ခဲ့ချေပြီ။

စင်စစ်အားဖြင့် မဂ်ဖိုလ်နိဗ္ဗာန်ကိုရရှိရန်ထိုက်တန်သည့် သီလတော်မြတ်တို့ကို ဖြည့်ကျင့်ခြင်း၊ ဓုတင်အကျင့်မြတ်တို့ကိုဆောက်တည်ခြင်း၊ သမထ-ဝိပဿနာတရားများကို ပွါးများကြခြင်းတည်းဟူသော အငြိမ်းဓာတ်ကိုရလိုသသူ နတ်လူတို့၏  ပုဗ္ဗဘာဂပဋိပဒါအကျင့်မြတ် အကျိုးငှါသာ ပါရမီတော်တို့ကို ဖြည့်ကျင့်တော်မူခဲ့ခြင်းဖြစ်လေသည်။

ထို့ကြောင့်ပင် မဟာပရိနိဗ္ဗာနဓာတ်ဖြင့်ချုပ်ငြိမ်းတော်မူအံ့ဆဲဆဲအခါ လျောင်းတော်မူရာ သလွန်တော်ထက်မှနေ၍ “အာနန္ဒာ ထို့ကြောင့် ဤ (သာသနာတော်)၌ (လောကုတ္တရာ) တရားနှင့် လျော်သော တရားကိုကျင့်လျက် နေကုန်အံ့၊ လျော်သော အကျင့်ကိုကျင့်လျက် နေကုန်အံ့၊ တရားနှင့် လျော်စွာ ကျင့်လျက်နေကုန်အံ့ဟု ဤသို့နှလုံးသွင်းလျက် သင်တို့ ကျင့်ကြံအားထုတ်ရမည် အာနန္ဒာ''ဟု မိန့်မှာတော်မူခဲ့လေသည်။

ပစ္စည်း လာဘ်လာဘ အာမိသထက် အကျင့်မြတ်ဓမ္မကို အလေးဂရုပြုတော်မူသော ဘုရားရှင့်သာသနာတော်၌ ဓမ္မပူဇာ၏ သဘောကိုထဲထဲဝင်ဝင် သိမြင်အောင်ကြိုးစားပြီးလျှင်၊ ဆွမ်းတော်တင် ပန်းတော်ကပ်၊ ဓမ္မကထိကအား နဝကမ္မဖြင့်ပူဇော်စသည့် အာမိသပူဇာဖြင့် ပူဇော်ရုံမျှဖြင့် ကျေနပ်နှစ်သိမ့်မနေကြဘဲ၊ ဘုရားရှင်နှစ်သက်တော်မူသည့် ဓမ္မပူဇာ အကျင့်မြတ်ဖြင့် ပူဇော်နိုင်အောင် ကြိုးစားအားထုတ်တော်မူကြပါကုန်စို့ ဗုဒ္ဓဘာသာ ကလျာဏနွယ်ဝင် သူတော်စင် သူတော်ကောင်းအပေါင်းတို့..။


ကျမ်းကိုး။   ။ အင်္ဂုတ္ထိုရ် ပါဠိတော်- အဋ္ဌကထာ၊ ခုဒ္ဒကပါဌအဋ္ဌကထာ၊သုတ်မဟာဝါအဋ္ဌကထာ- ဘာသာဋီကာ၊ ပါဠိတော် မြန်မာပြန်၊ သပြေကန်ပရိတ်ကြီးနိဿယသစ်၊ မင်းပူးဆရာတော် ဦးသြဘာသ၏ တေမိယ ဇာတ်တော်ကြီးဝတ္ထု

မေတ္တာဖြင့်
အရှင်ဝိသာရဒ (ရမ္မာဝတီ)